العكننة مساء ( 6 ) .. حسام الغمري

حسام الغمري

العكننة مساء ( 6 )
………………………
هذا البوست بهدف استفزازك وحرق دمك على المسا ولا يخلو من السخرية الممزوجة بالمرارة بأمل فقع مرارة حضرتك ، ولا ينصح لمرضى ضغط الدم والإكتئاب المزمن !!
…………………..
سنة 1960 قرر الزعيم المفّدى خالد الذكر جمال عبد الناصر أن تدخل مصر سوق انتاج السيارات ، وبالصلاة على النبي بدأت مصر انتاج السيارة ” رمسيس ” اللي كان سعرها ايامها 200 جنية يا بلاش .. يعني تمن ترينج تشتريه النهاردة للواد حمادة علشان يحضر بيه صلاة العيد .. إلا لو كان حمادة ناوي يقضيها من ” دراينكز ”
بصرف النظر ان السيارة رمسيس كان شكلها ضارب بوز ، مخنوقة من حياتها ، وتحس وانت راكبها ان حماتها مثلا معكننة عليها ، لكنها رغم كل ده كانت خطوة مهمة على الطريق .
سنة 1972 السادات وقف المشروع لأسباب غير معروفة …
انا بس عاوزك تقارن بين وضع تصنيع السيارات في مصر ودولة زي كوريا الجنوبية ..
وقبل ما تقولي الحرب واسرائيل ، خليني اقولك ان كوريا الجنوبية دخلت حرب تكسير عظام مع جارتها كوريا الشمالية انتهت بهدنة مش بمعاهدة سلام ، وربنا مواعدهم بعيلة ” سونج ” ماسكين كوريا الشمالية مش مخلينهم يعرفوا يرمشوا .. ايشي نووي .. ايشي صواريخ تنضرب كل شوية وتعدي فوق بحر اليابان ، للأمانة راوشينهم ..
سنة 1960 راجل اعمال كوري جنوبي قرر دخول عالم صناعة السيارات وسنة 1962 قررت حكومة كوريا الجنوبية دعم صناعة السيارات ..
( فلاش فورورد – يعني طالع للمستقبل عكس فلاش باك يا اسطوات )
انتاج كوريا الجنوبية سنة 2013 بس 4.5 مليون عربية
يعني لو بتمصلح في العربية الواحدة بألف دولار شاكب راكب يعني 4.5 مليار دولار ولا الحوجة للشحاته من رز الخليج ، فما بالك لو كانت المصلحة خمس بواكي خضر مثلا في العربية الواحدة .
ولما اتكلم عن عربيات كوريا الجنوبية يعني بتكلم عن الهونداي .. الدايو .. الكيا ( يا مزاجو )
طبعا معظم العربيات دي بتتصدر لأوروبا وأمريكا ..
يعني بسلامتهم عسكر مصر لو كانوا اهتموا بصناعة السيارات كان زماننا احنا اللي بنصدر بدل الكوريين لسببين
1- اننا أقرب لاوروبا من كوريا وده يوفر في مصاريف النقل والشحن
2- الايدي العاملة المصرية حاجة ببلاش كده والعدد في الليمون بس يشربوا الصنعة
طب ليه البهوات العسكر معملوش كده ؟
علشان النظام العالمي عاوز اقتصادك يبقى اقتصاد ( القرى السياحية ) الناس تيجي تصيف وتشتي عندنا ، غير كده تعمل مصنع فراخ #وطنية ماشي تعلف الشعب ، لكن اقتصاد مبني على تصنيع حقيقي اسرائيل تزعل
طب ايه اللي يزعل الست اسرائيل ؟
1- لازم تفضل تكح تراب علشان زي ما شفت وقت نقل السفارة يطلع السيسي يقول منقدرش نعمل حاجة وانت يا حرام مقطوع النفس مش قادر تنطق
2- اللي يعمل عربية هونداي ممكن يتشاقى وتكبر في دماغة يعمل هامر وبعدين يتشاقى اكتر يركب عليها صواريخ ، وممكن تطلع في دماغه يصدر سلاح ، وساعتها هنتأخر كتير في صناعة ( الحلل وأواني الطهي ) وهما خايفين بصراحة على مستقبل ( الحلل ) المصرية وراحة ست البيت
لو عسكر مصر فيهم حاكم واحد مش خاين كان نفذ برنامج تصنيع متطور مستفيدا من موقع مصر الاستراتيجي وقربها من كل الاسواق العالمية ، ووجود الأيدي العاملة الرخيصة ،
( دخان للرجالة وكله يبقى في التمام )
لكن هو يلسعك 300% جمارك على السيارات يلهفهم وقضيت بالنسباله ولا تفرق معاه العملة الصعبة ، والغرب زي ما بيسلموهم البلد نضيف العسكر تسلمهم خيرها في بنوك اوروبا وامريكا على نضيف برضه
طبعا كوريا تألقت كمان في صناعة الموبايلات والتابلت ..
وعلشان اختمها معاك عكننة اصلي عاوزك تعرف ان اردوغان بدأ في تصنيع اول حاملة طائرات تركية محلية الصنع وداخل على مشروع مقاتلات تركية بالتعاون مع بريطانيا ، بس لانه حاكم مدني منتخب بارادة شعبية مش بارادة الدبابة ومن وراها المعونة الأمريكية !!
وربنا ما يحرمنا من صناعة الكباري
هع

العكننة مساء ( 6 ) ………………………هذا البوست بهدف استفزازك وحرق دمك على المسا ولا يخلو من السخرية الممزوجة…

Posted by Hossam Elghamry on Saturday, May 19, 2018

شاهد أيضاً

متحدث الرئاسة التركية : الوضع الاقتصادي بدأ في التحسن

قال المتحدث باسم الرئاسة التركية، إبراهيم قالن، الأربعاء، “إن الوضع الاقتصادي للبلاد بدأ يتحسن اعتبارا …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *